အမေရိကန်တို့ရဲ့သမိုင်းဝင်စစ်မြင်းကြီး Humvee

 အားလုံးပဲမင်္ဂလာပါဗျာ ရန်ထီးနေလချန်နယ်ကနေပြန်လည်ကြိုဆိုပါတယ်

ကမ္ဘာ့အင်အားအကြီးဆုံးစစ်တပ်ကိုပိုင်ဆိုင်ထားတဲ့ အမေရိကန်ဟာ သမိုင်းမှာ လူအပြောများဆုံးအခိုက်အတန့်တွေ အများကြီးရှိခဲ့ပါတယ်။ ဒုတိယကမ္ဘာစစ်ကိုအဆုံးသတ်ခဲ့တာ၊ လကမ္ဘာပေါ်လူသားတွေခြေချနိုင်ခဲ့တာအပြင် ယနေ့ခေတ်မှီတဲ့ကမ္ဘာကြီးကိုပုံဖော်ခဲ့တဲ့ နည်းပညာအများစုကို အမေရိကန်နိုင်ငံမှာ ဖန်တီးခဲ့တာဖြစ်ပါတယ်။ နည်းပညာ‌ရောငွေအင်အားပါအလျှံပယ်သုံးနိုင်တဲ့နိုင်ငံကြီးတစ်ခုက အမှားအယွင်းဖြစ်ခဲ့တယ်ဆိုရင်တော့ သူရဲ့ကြီးကျယ်တဲ့ဂုဏ်သတင်းနဲ့အတူ ‌ဝေဆာတဲ့လှောင်ပြောင်မှု့တွေကို ရရှိမှာဖြစ်ပါတယ်။ အဆိုးဆုံးရလဒ်တွေရခဲ့တဲ့ ဗီယက်နမ်စစ်ပွဲနဲ့  နှစ် ၂၀လုံးတိုက်ခဲ့တဲ့ အာဖဂန်ရဲ့တာလီဘန်တိုက်ပွဲတွေမှာ အမေရိကန်တွေရဲ့ ဂုဏ်သတင်းအဆိုးရွားဆုံးကျဆင်းခဲ့ပါတယ်။ ဒါနဲ့အတူထွက်လာတဲ့သတင်းတစ်ခုကတော့ အမေရိကန်တွေရဲ့ သမိုင်းဝင်စစ်မြင်းကြီးတွေဖြစ်တဲ့ Humvee တွေကို အစားထိုးတော့မယ်ဆိုတဲ့သတင်းပဲ ဖြစ်ပါတယ်။ ဒီတော့ အမေရိကန်တွေ အာဖဂန်မှာစစ်ရှုုံးရတာ Humvee တွေကြောင့်လား ဘာတွေနဲ့အစားထိုးမှာလဲစတာကို ကျွန်တော်တို့အဖြေရှာကြည့်ရအောင်ဗျာ

 US Humvee

ကျွန်တော်တို့နဲ့ထိတွေ့နေတဲ့ရုပ်ရှင်နယ်ပယ်ကိုကြည့်ရင် ဒုတိယကမ္ဘာစစ်နောက်ပိုင်းရိုက်တဲ့ အမေရိကန်စစ်ကားအများစုမှာ တင့်ကားတွေသုံးရိုက်တဲ့စစ်ကားတော်တော် နည်းတာကိုတွေ့ရပါတယ်။ အီရတ်၊ အာဖဂန်၊ဆိုမာလီ ‌‌‌‌‌ဒေသတွေကိုအခြေခံ ရိုက်ကူးထားတဲ့ စစ်ကားတွေမှာ Humvee တွေကိုအများဆုံးတွေ့ရမှာဖြစ်ပါတယ်။ Humvee ဆိုတာက High Mobility Multipurpose Wheeled Vehicle ကို အတိုကောက်ခေါ်တာဖြစ်ပါတယ်။ဗမာလိုကတော့ လျင်မြန်စွာစစ်ကစားနိုင်တဲ့ စွမ်းရည်မြင့် ဘက်စုံသုံးစက်တပ်ယာဉ်လို့ အဓိပ္ပါယ်ရပါတယ်။ဗီယက်နမ်မှာ စစ်ရှုံးသွားတဲ့ အမေရိကန်တွေဟာ စစ်အတွင်းမှာအသုံးပြုခဲ့တဲ့စက်ယန္တာရားတွေဖြစ်တဲ့ M151 Jeep , M561 Gama Goat နဲ့တခြားထောက်ပံရေး၊ ကယ်ဆယ်ရေးဂျစ်ကားတွေနေရာမှာ အစားထိုးဖို့ပြင်ဆင်ခဲ့ပါတယ်။

US M151 Jeep

ကနဦးပြင်ဆင်မှု့တွေထဲမှာ ၁၉၆၉ မှာ FMC Corporation ကထုတ်ခဲ့တဲ့ XR311 prototypeနဲ့ ၁၉၇၇ မှာထုတ်ခဲ့တဲ့ Lamborghini  ရဲ့ Cheetah ချီတာတွေဟာ  အမေရိကန်စစ်တပ်နဲ့ စာချုပ်နိုင်ဖို့တော်တော်လေးရေပန်းစားခဲ့ပါတယ်။ ၁၉၇၉ မှာ အမေရိကန်စစ်တပ်ဟာ သဲကန္တာရနဲ့ကုန်းမြင့်အပါအဝင် ‌မြေနေရာမရွေအသုံးပြုနိုင်တဲ့အပေါ့စား ဘက်စုံသုံးယာဉ်ပုံစံကို တင်ဒါခေါ်ယူခဲ့ပါတယ်။ အရေးကြီးတဲ့စံသတ်မှတ်ချက်တွေအနေနဲ့ ၆၀ဒီဂရီမက်စောက်တဲ့ ကုန်းမြင့်တွေကိုတက်နိုင်ဖို့ ၄၀ဒီဂရီကုန်းစောင်းတွေကို ကောင်းမွန်စွာကျော််ဖြတ်နိုင်ဖို့ ၅ပေနက်တဲ့‌ရေအောက်မှာဖြတ်သန်းမောင်းနိုင်ဖို့ စတဲ့အချက်တွေအပြင် ထောက်ပံရေးပစ္စည်းတွေသယ်ယူဖို့နဲ့ အရေးပေါ်လူနာတင်ယဉ်အဖြစ်ပါ အသုံးချနိုင်ရမှာဖြစ်ပါတယ်။ ကမ္ဘာ့အနှံ့ကကုမ္မဏီပေါင်း ၆၁ခုကဝင်ရောက်ယှဉ်ပြိုင်ကြတဲ့အထဲမှာ American Motors Corporation က ၁၉၈၁ မှာအနိုင်ရရှိခဲ့ပြီး Humvee တွေကိုထုတ်လုပ်ခဲ့ပါတယ်။ နမူနာပုံစံများစွာစမ်းသပ်ခဲ့ပြီးတဲ့နောက် ၁၉၈၃ မှာ အမေရိကန်စစ်တပ်နဲ့၅နှစ်စာချုပ် စတင်ချုပ်ဆိုခဲ့ပါတယ်။

Humvee တွေကို ၁၉၈၃ မှာစတင်ထုတ်လုပ်ခဲ့တာဖြစ်ပြီး ယနေ့အချိန်ထိ အစီးရေ ၂ သိန်း ၈သောင်း၁ထောင်ထုတ်လုပ်ခဲ့တယ်လို့သိရပါတယ်။ အလေးချိန်အနေနဲ့ ယာဉ်အမျိုးအစားနဲ့ တပ်ဆင်ထားတဲ့ သံချပ်ကာပေါ်မူတည်ပြီး ပေါင် ၅၂၀၀ ကနေ ၈၅၀၀ ထိရှိမှာဖြစ်ပါတယ်။ အမြင့် ၆ပေ အလျား ၁၅ပေ ပေ အနံ၇ပေရှိတဲ့ Humvee တစ်စီးဟာ တိုက်ပွဲဝင်စစ်သည် ၈ဦးအထိလိုက်ပါနိုင်ပြီး ၁နာရီကို မိုင်၇၀ကျ်ောသွားနိုင်တယ်လို့သိရပါတယ်။

ဘက်စုံသုံး Humvee

ကုန်ကျစာရိတ်အနေနဲ့ Humvee တစ်စီးဟာ အမေရိကန်ဒေါ်လာ ၂သိန်းခွဲကျော်ကျသင့်မှာဖြစ်ပါတယ်။ မြန်မာငွေနဲ့တွက်ကြည့်မယ်ဆိုရင် သိန်း၄ထောင့်၁ရာကျော်ရှိပါတယ်။လက်နက်အပြည့်အစုံတပ်ဆင်ထားတဲ့ အမေရိကန်စစ်သားတစ်ယောက်ဟာ အမေရိကန်ဒေါ်လာ ၁၈၀၀၀ ကျော် မြန်မာငွေသိန်း၃၀၀ကျော်ကုန်ကျပါတယ်။ ဆိုတော့ အကြမ်းဖျင်းပဲတွက်ကြည့်ရင် စစ်သည် ၅ယောက်ပါတဲ့ Humvee တစ်စီးအတွက် အမေရိကန်စစ်တပ်ဟာ မြန်မာငွေ သိန်း ၅ထောင်၆ရာကျော် ကုန်ကျမှာဖြစ်ပြီး အကြမ်းဖက်လက်နက်ကိုင်တွေအနေနဲ့ ‌ဒေါ်လာ ၅၀၀ မြန်မာငွေ ၈သိန်းဝန်းကျင် RPG တစ်လုံးစာ သာကျသင့်မှာဖြစ်ပါတယ်။

လျင်မြန်စွာစစ်ကစားနိုင်ဖို့အဓိကရည်ရွယ်ထားတဲ့ Humvee တွေဟာ ကမ္ဘာအနှံကစစ်ပွဲတွေမှာ ကောင်းစွာခြေစွမ်းပြနိုင်ခဲ့ပေမယ့် အသေခံဗုံးခွဲတိုက်ခိုက်တာတွေ၊ မြို့ပြတိုက်ပွဲတွေအပြင် ဘယ်ကပစ်မှန်းမသိတဲ့ RPG နဲ့ Sniper တွေရဲ့ရန်က ကာကွယ်ပေးနိုင်စွမ်းအားနည်းတာကို အမေရိကန်တွေ သတိထားမိသွားပါတယ်။

ပေါ့ပါးပြီးဘက်စုံသုံးလို့ရတဲ့Model အစား ပိုပြီးအကြမ်းခံတဲ့ပုံစံနဲ့အစားထိုးဖို့  အမေရိကန်စစ်တပ်ဟာ နမူနာပုံစံတွေကိုစတင်ရှာဖွေခဲ့ပါတယ်။လွန်ခဲ့တဲ့နှစ်တွေမှာ တိကျတဲ့ပြောင်းလဲမှုမရှိခဲ့ပေမယ့် ၂၀၂၁ အစောပိုင်းလတွေမှာတော့ Humvee တွေကိုအစားထိုးခံရတော့မယ်ဆိုတာသေချာသွားခဲ့ပါတယ်။ ပုံစံအသစ်အနေနဲ့ အော့ရှ်ကော့ရှ့် Oshkosh Corporation ရဲ့  JLTV တွေကိုအစားထိုးတပ်ဆင်သွားမှာဖြစ်ပါတယ်။ ဒါပေမယ့် လုံးဝအစားထိုးသွားမှာမျိုးမဟုတ်ပဲ JLTV တွေနဲ့ပေါင်းစပ်ပြီး တပ်ဖွဲတွေကို ဖွဲ့စည်းသွားမှာဖြစ်တယ်လို့ သိရပါတယ်။

JLTV and Humvee

အခုကျွန်တော်ပြောပြခဲ့တာကတေ့ အမေရိကန်တွေရဲ့ နှစ်၄၀ နီးပါး သက်တမ်းရှိတဲ့သမိုင်းဝင်စစ်မြင်းကြီး အကြောင်းပဲဖြစ်ပါတယ်။ အမျိုးတွေကြိုက်နှစ်သက်မယ်လို့မျှော်လင့်ပါတယ်။

ကြည့်ရှု့ပေးတဲ့အတွက်အားလုံးကို ကျေးဇူးတင်ပါတယ်

ရုပ်သံကိုကြည့်ရှု့ရန်