မဲဇာတောင်ခြေ
မဲဇာတောင်ခြေ ၊ စီးတွေတွေတည့်
မြစ်ရေဝန်းလည် ၊ မြိုင်တောဆီက
ရွှေပြည်ကိုသာ ၊ တရှာတော့မိ
မိုးရှိရှိလျှင် ၊ သီရိကျက်သရေ
တက်ဖြိုးဝေသား ၊ အောင်မြေကြော့ကြော့
ကုန်းမော့မော့နှင့် ၊ ဘိုးတော်ကောင်းမှု့
တည်ထားပြုသည် ၊ ဇမ္ဗူ့ဆီမီး
ခြောက်ရောင်ညီးမျှ ၊ ဂူကြီးသခင်
ရွှေလင်းပင်နှင့် ၊ ရွှေခြင်္သေ့မြွေ
စ၍ရေသော် ၊ ရွှေစေတီကြီး
အသီးသီးတည့် ၊ ပိတ်ဆီးခြယ်သန်း
လျှပ်ရောင်တန်းမျှ ၊ ရွှေနန်းရွှေဘုံ
အလုံးစုံကို ၊ အာရုံမျက်မြင်
ဖူးမြှော်ခြင်၍ ၊ သည်တွင်ရွှေမြို့
သည်သို့စေတီ ၊ သည်ဆီရွှေနန်း
ဖြောင့်တန်းတော့မည် ၊ စိတ်ကရည်သည်
ရွှေပြည်ဌာန ၊ ဝေးသောကြောင့်။
သဲသာသောင်မြေ ၊ မြစ်ကမ်းခြေလည်း
အကြေတစ်ပြင် ၊ တို့အောက်ခွင်ဝယ်
ရေရှင်ပတ်ဝန်း ၊ ပျော်ဖွယ်ထွန်းလိမ့်
တစ်ကျွန်းလောက်ပင် ၊ ဝေးမည်ထင်ခဲ့
စီးသွင်ညိုရစ် ၊ မဲဇာမြစ်လည်း
ထစ်ထစ်ထွန်းဘိ ၊ ချုံအတိနှင့်
တောကြီးဆိတ်ညံ ၊ ဆည်းကျံကျံဝယ်
ဓူဝံမပေါ် ၊ မမြော်ပါရ
နေကိုတလည်း ၊ ဘယ်ကရှေ့နောက်
ဘယ်တောင်မြောက်ဟု ၊ တွေးထောက်မမှန်
ဖန်ဖန်အုံဩ ၊ ကြံတိုင်းမောစွ
ဘယ်တောဘယ်မြိုင်၊ မသိနိုင်ခဲ့
မခိုင်စိတ်ဝမ်း ၊ နေ့တိုင်းလွမ်းရှင့်
ကင်းစမ်းတောင်က ၊ လေဦးစ၍
နောက်မှလေရှည် ၊ အတည်တည်သည်
လေပြည်လာက ၊ အေးသောကြောင့်။
ပွဲခါညောင်ရည် ၊ သွန်းမြဲပေတည့်
ရိုသေသဒ္ဓါ ၊ ထုံးစဉ်လာဖြင့်
မဲဇာရပ်သူ ၊ တောင်းဆုယူသည်
ရွှေဂူတော်နှင့် ၊ ရှုတိုင်းသင့်သား
မိုးမြင့်သီခေါင် ၊ မဲဇာချောင်က
တစ်တောင်လုံးမှိုင်း ၊ စ၍ဆိုင်းသော်
တောင်တိုင်းယှက်၍ ၊ ဝန်းကာဝေ့သည်
တောင်ငွေ့ဝေဝေ ၊ အထွေထွေနှင့်
လေလည်းရောရော ၊ မိုးမပါဘဲ
သံဝါဖြောက်ဖြောက် ၊ ဆီးနှင်းပေါက်လည်း
မိုးလောက်ပြင်းထန် ၊ သွန်းချပြန်သော်
ယုဂန်ထင်ရှား ၊ တောင်တော်ဖျားက
ရထားယာဉ်သာ ၊ နေစကြာလည်း
ရောင်ဝါမထွန်း ၊ ချမ်းရှာလွန်း၍
တည့်မွန်းချိန်နေ ၊ ရောက်လွယ်စေဟု
စေ့ရေလှည့်လည် ၊ တလျက်မြည်သည်
နေခြည်ဖြာမှ ၊ နွေးသောကြောင့် ။
ပိုဒ်စုံရတု လက်ဝဲသုန္ဒရ
 |
| မဲဇာတောင်ခြေ - လက်ဝဲသုန္ဒရ |
YHNL